BREAKING NEWS

விரைவில் அறிமுகமாகிறது டாடா நெக்ஸான் எஸ்.யூ.வியின் ஸ்பெஷல் எடிசன்

டாடா நெக்ஸான் எஸ்.யூ.வியின் ஸ்பெஷல் எடிசன் மாடல் விரைவில் விற்பனைக்கு வரவுள்ளது.

விழா காலங்களையொட்டி கார், பைக் நிறுவனங்கள் ஸ்பெஷல் எடிசன் மாடல்களை அறிமுகம் செய்வது வழக்கமான ஒன்று. ஆனால், தற்போது ஆட்டோமொபைல் துறை சரிவை சந்தித்துள்ளதால், வாடிக்கையாளர்களை கவர்வதற்கு ஸ்பெஷல் எடிசன் மாடல் கட்டாயமாக உள்ளது.

இதையடுத்து டாடா மோட்டார்ஸ் நிறுவனம் தனது நெக்ஸான் எஸ்.யூ.வியின் ஸ்பெஷல் எடிசன் மாடலை விரைவில் விற்பனைக்கு கொண்டு வர இருக்கிறது. இந்த புதிய மாடலின் டீசரையும் வெளியிட்டுள்ளது.

இந்த ஸ்பெஷல் எடிசன் மாடலானது நெக்ஸான் க்ராஸ் என்ற பெயரில் வர உள்ளது. இந்த புதிய காரின் அம்சங்கள் குறித்து இதுவரை எந்த தகவலும் வெளிவரவில்லை.

நெக்ஸான் எஸ்.யூ.வியின் க்ரில், சைடு மிரர்கள் விசேஷ பூச்சுடன் வரும் எனவும், உட்புறத்தில் இதன் பிரதிபலிப்பாக சிறப்பு அலங்காரங்கள் வரலாம் எனவும், அலாய் வீல்களும் எதிர்பார்க்கப்படுகிறது.

கடந்த ஆண்டு அறிமுகம் செய்யப்பட்ட க்ராஸ் எடிசன் மாடலை போன்றே, டேஷ்போர்டு அலங்கார வேலைப்பாடுகள் செய்யப்பட்டு இருக்கலாம். தையல் வேலைப்பாடுகளுடன் கூடிய இருக்கைகள் மற்றும் க்ராஸ் எடிசன் பேட்ஜ் ஆகியவை இடம்பெற்றிருக்கும்.

இந்த புதிய ஸ்பெஷல் எடிசன் மாடலில் 4 ஸ்பீக்கர்களுடன் கூடிய ஹார்மன் மியூசிக் சிஸ்டம், புளூடூத் வசதி, ஆட்டோமேட்டிக் க்ளைமேட் கன்ட்ரோல் சிஸ்டம், ரிவர்ஸ் பார்க்கிங் சென்சார்கள், ரியர் ஏசி வென்ட்டுகள் உள்ளிட்டவற்றை எதிர்பார்க்கலாம்.

இந்த ஆண்டு நெக்ஸான் எஸ்.யூ.வியில் க்ராஸ் மற்றும் க்ராஸ் ப்ளஸ் ஆகிய இரண்டு மாடல்களில் ஸ்பெஷல் எடிசன் வேரியண்ட்டுகளை டாடா மோட்டார்ஸ் அறிமுகம் செய்யும். எஞ்சின் தேர்வுகளில் எந்த மாற்றமும் இருக்காது.

இந்த காரில் 110 பிஎஸ் பவரையும், 170 என்எம் டார்க் திறனை வழங்கும் 1.2 லிட்டர் டர்போ பெட்ரோல் எஞ்சின் மற்றும் 1.5 லிட்டர் டீசல் எஞ்சின் தேர்வுகள் வழங்கப்படும். இரண்டிலுமே 6 ஸ்பீடு மேனுவல் கியர்பாக்ஸ் அல்லது ஏஎம்டி கியர்பாக்ஸ் தேர்வுகள் கொடுக்கப்படும்.

இந்த 2019ம் ஆண்டுக்கான நெக்சானில் ஆரெஞ்சு நிற கோட்டிங் கொடுக்கப்பட்ட கண்ணாடி மற்றும் வீல் கேப்கள் இருக்கலாம் என எதிர்பார்க்கப்படுகிறது. மேலும் காரின் உள்ளே உள்ள ஏர் வெண்ட், டோர் பேனல்கள் அனைத்தும் ஆரெஞ்சு நிறம் கொண்டிருக்க வாய்ப்புள்ளதாக தெரிகிறது.

சாதாரண வேரியண்ட்டுகளைவிட கூடுதல் விலையில் அதிக சிறப்பம்சங்களுடன் இந்த புதிய டாடா நெக்ஸான் க்ராஸ் எடிசன் மாடல் கூடுதல் மதிப்பை வழங்கும். விரைவில் டாடா நெக்ஸான் எஸ்யூவியின் ஃபேஸ்லிஃப்ட் எனப்படும் மேம்படுத்தப்பட்ட மாடலும் அறிமுகம் செய்யப்பட இருப்பது குறிப்பிடத்தக்கது.




Leave a Reply