BREAKING NEWS

முதல்வர் எடப்பாடி பழனிசாமி லண்டன் செல்வது ஏன்?அமைச்சர் ராஜேந்திர பாலாஜி விளக்கம்

முதல்வர் எடப்பாடி பழனிசாமி லண்டன் செல்வது ஏன்? என்று அமைச்சர் ராஜேந்திர பாலாஜி விளக்கம் அளித்துள்ளார்.

விருதுநகர் அருகேயுள்ள எரிச்சநத்தம் கிராமத்தில் குடிமராமத்து பணிகள் மூலமாக கண்மாய்களை தூர் வாரும் பணிகளுக்கான பூமிபூஜை நேற்று நடைபெற்றது. மாவட்ட ஆட்சியர் அ.சிவஞானம் தலைமை வகித்த இந்த விழாவில், பால்வளத்துறை அமைச்சர் கே.டி.ராஜேந்திர பாலாஜி சிறப்பு விருந்தினராகக் கலந்துகொண்டு பூமி பூஜையைத் தொடங்கிவைத்தார். அதைத்தொடர்ந்து அமைச்சர் ராஜேந்திர பாலாஜி நிருபர்களுக்கு பேட்டி அளித்தார். அப்போது, அவர் கூறியதாவது:-

லண்டன் செல்வது ஏன்?

அமெரிக்காவில் வாழும் தமிழர்களின் மூலமாக புதிய தொழிற்சாலைகளை கொண்டு வருவதற்காகத்தான் முதல்வர் லண்டன் செல்கிறார். ஸ்டாலினுக்கு எங்களை குறை கூறுவதுதான் வேலை. மத்திய அரசின் அனுமதியோடு மாநில அரசுக்கு தேவையான திட்டங்களை கொண்டு வருவதற்காகதான் வெற்றிகரமான பயணங்களை முதல்வர் மேற்கொள்ள உள்ளார்.

நல்லவர்கள் யார் ஆதரவு கொடுத்தால் அ.தி.மு.க. ஏற்றுக்கொள்ளும். பா.ஜ.க.வோடு நல்ல உறவில் உள்ள இயக்கம் அ.தி.மு.க.தான். தேசியத்தின் பார்வையில் பா.ஜ.க. எடுக்கும் முடிவுகள் அனைத்தும் அ.தி.மு.க.வை கவர்ந்துள்ளது. தி.மு.க. பிரிவினையை தூண்டக்கூடிய கட்சி. தமிழக முதல்வர் எடப்பாடியார் தேசியத்தையும் தெய்வீகத்தையும் மதிக்க கூடியவர்.

கமல் காளான் போல

மத்திய உள்துறை எடுக்கும் பட்டியலில் இந்திய இறையாண்மைக்கு எதிராக செயல்படுபவர் என்கிற பட்டியலில் தி.மு.க. மாட்டினால் நாங்கள் என்ன செய்ய முடியும்? அ.ம.மு.க.வில் போட்டியிடுவதற்கு வேட்பாளா்கள் இல்லை. அந்த கட்சியில் இருந்தவர்கள் அனைவரும் எங்களிடம் வந்துவிட்டார்கள். தேர்தல் களத்தில் அ.தி.மு.க., தி.மு.க.தான் போட்டியிடும். அதில் அ.தி.மு.க.தான் வெற்றிபெறும். கமல்ஹாசன் கட்சி திடீரென பெய்த மழையில் முளைத்த காளான் போல. திடீரென வருவார்கள் போய் விடுவார்கள். பிக்பாஸ் நிகழ்ச்சி முடிந்தவுடன் கமல் மீண்டும் அரசியலுக்கு வருவார்.

இவ்வாறு அவர் கூறினார்.




Leave a Reply