BREAKING NEWS

“பா.ஜ.க.வுடன் தமிழ் மாநில காங்கிரஸ் இணையும் என்பது வதந்தி”

பாஜகவுடன் தமிழ் மாநில காங்கிரஸ் இணையும் என்பது வதந்தி என அக்கட்சியின் தலைவர் ஜி.கே.வாசன் தெரிவித்துள்ளார். நடந்து முடிந்த பாராளுமன்ற தேர்தலில் த.மா.கா., தமிழகத்தில் அ.தி.மு.க -.பா.ஜனதா கூட்டணியில் சேர்ந்து தஞ்சை தொகுதியில் போட்டியிட்டது. த.மா.கா. தலைவர் ஜி.கே.வாசன் அ.தி.மு.க., பாரதிய ஜனதா வேட்பாளர்களுக்கு ஆதரவாக பிரசாரம் செய்தார்.

அதன் பிறகு நடந்த இடைத்தேர்தல்களிலும் இந்த கூட்டணியை ஆதரித்தார்.தொடர்ந்து பிரதமர் மோடியையும், மத்திய அரசு திட்டங்களையும், தமிழக அரசையும் ஆதரித்து வருகிறார். சமீபத்தில் சீன அதிபரை சந்திப்பதற்காக சென்னை வந்த பிரதமர் மோடியை ஜி.கே.வாசன் நேரில் சென்று வரவேற்றார்.

அப்போது தன்னை டெல்லியில் வந்து சந்திக்கும்படி மோடி அழைப்பு விடுத்ததாக அரசியல் வட்டாரத்தில் பேசப்பட்டது.இதற்கிடையே ஜி.கே.வாசனை பா.ஜனதாவில் சேர்க்க முயற்சிகள் நடந்ததாக கூறப்படுகிறது. தற்போது தமிழக பா.ஜனதாவில் தலைவர் பதவி காலியாக உள்ளதால் த.மா.கா.வை பா.ஜனதாவுடன் இணைத்து ஜி.கே.வாசனை தலைவராக்க அழைப்பு விடுத்ததாக தகவல்கள் வெளியாகின.ஆனால் காங்கிரஸ் பாரம்பரியத்தில் வந்த ஜி.கே.வாசன் இதற்கு தயக்கம் காட்டி வருவதாக தெரிகிறது.

த.மா.கா.வை பா.ஜனதாவுடன் இணைப்பதை தொண்டர்கள் ஏற்பார்களா? வாசன் எடுக்கும் முடிவு என்ன? என்பது பற்றிய எதிர்பார்ப்பு நீடித்து வருும் நிலையில், டெல்லியில் பிரதமர் மோடியை தமிழ் மாநில காங்கிரஸ் தலைவர் ஜி.கே.வாசன் நேற்று சந்தித்து பேசினார். சுமார் 20 நிமிடங்கள் நடைபெற்ற இந்த சந்திப்புக்கு பிறகு வாசன் செய்தியாளர்களை சந்தித்தார்.

அப்போது அவர் கூறியதாவது:-மத்திய, மாநில அரசுகள் மீதும் அதனை சார்ந்த கூட்டணி கட்சிகள் மீதும் மக்களுக்கு நம்பிக்கை ஏற்பட்டுள்ளது, அதனாலேயே இடைத்தேர்தலில் வெற்றி பெற்றோம் என்றும் இடைத்தேர்தல் வெற்றி மக்களின் மனநிலை மாற்றத்தை காட்டுகிறது என்றும் கூறினார். மேலும் அவர் கூறியதாவது:- கூட்டணி கட்சி தலைவர் என்ற முறையில் பிரதமர் மோடியை சந்தித்து 20 நிமிடம் பேசினேன்.

தமிழகத்தில் செயல்படுத்தப்படும் மத்திய, மாநில அரசுகளின் வளர்ச்சி திட்டங்கள் குறித்து மோடியிடம் எடுத்து கூறினேன். தமிழக அரசியல் சூழல் குறித்தும், மரியாதை நிமித்தமாகவும் பிரதமர் மோடியை சந்தித்தேன். கல்வி, விவசாயம், தொழில், வேலைவாய்ப்பு, தமிழுக்கான முக்கியத்துவம் குறித்து பிரதமரிடம் எடுத்துக் கூறினேன். நான் தெரிவித்த கருத்துகளை பிரதமர் கவனமாக கேட்டுக் கொண்டார். அதிமுக அரசு செயல்படுத்திய திட்டங்கள் மக்களிடம் சென்று சேருவதை தெரிவித்தேன்.

மராட்டிய மாநில தேர்தல் விவகாரங்களில் அமித்ஷா தீவிரமாக உள்ளதால் அவரை சந்திக்கவில்லை. பாஜகவுடன் தமிழ் மாநில காங்கிரஸ் இணையும் என்ற செய்தி வதந்தியே. தமிழ் மாநில காங்கிரஸ் தனித்தன்மையுடன் தொடர்ந்து செயல்படும் எனத் தெரிவித்தார்.




Leave a Reply

Your email address will not be published. Required fields are marked *