BREAKING NEWS

துணை முதல்வர் ஓ.பன்னீர்செல்வத்தை சந்திக்க நிர்மலா சீதாராமன் மறுப்பு – அரசியல் வட்டாரத்தில் பரபரப்பு.

 


டெல்லி சென்ற துணை முதல்வர் ஓ.பன்னீர்செல்வத்தை சந்திக்க, மத்திய பாதுகாப்பு அமைச்சர் நிர்மலா சீதாராமன் மறுத்துள்ளார். இது அ.தி.மு.க.வினரிடையே அதிர்ச்சியை ஏற்படுத்தியுள்ளது.

தொழில் வளர்ச்சி

தமிழகத்தில் தொழில் முதலீட்டிகளை அதிகரிக்க தமிழக அரசு பல்வேறு முயற்சிகளை மேற்கொண்டு வருகிறது. இதற்காக, கடந்த 2015ம் ஆண்டு முதலாம் உலக முதலீட்டாளர் மாநாட்டையும் சென்னை, நந்தம்பாக்கம் வர்த்தக மையத்தில் அரசு நடத்தியது.

இந்த மாநாட்டில் பல்லாயிரம் ேகாடி ரூபாய் மதிப்பிலான முதலீட்டில் தமிழகத்தில் தொடங்க பன்னாட்டு நிறுவனங்களுடன் ஒப்பந்தமும் செய்யப்பட்டது. இதையடுத்து, அடுத்த ஆண்டு ஜனவரி மாதம் சென்னையில் இரண்டாவது உலக முதலீட்டாளர் மாநாட்டை நடத்தவும் தமிழக அரசு ஏற்பாடு செய்துள்ளது.

டெல்லி பயணம்

இந்த நிலையில், கடந்த சில மாதங்களுக்கு முன்பு சென்னையை அடுத்த திருவிடந்தையில் ராணுவ கண்காட்சி நடைபெற்றது. இதனையடுத்து, தமிழகத்தில் ராணுவ தளவாடங்களுக்கான உதிரி பாகங்களை உற்பத்தி செய்யும் நிறுவனங்களை தொடங்க, தமிழக அரசு மத்திய அரசுடன் பேச்சுவார்த்ைத நடத்தியது. இந்த நிலையில், தமிழகத்தின் துணை முதல்-அமைச்சர் ஓ.பன்னீர்செல்வம் தனது ஆதரவாளர்களுடன் நேற்று முன்தினம் இரவு டெல்லி சென்றார்.

இந்தப் பயணத்தில், மத்திய பாதுகாப்பு அமைச்சர் நிர்மலா சீதாராமனை சந்திக்க அவர் திட்டமிட்டிருந்தார். மேலும், அவருடன் ராணுவ தளவாடங்களுக்கான உதிரி பாக தொழிற்சாலை தொடங்குவது குறித்தும் ஆலோசனை நடத்த முடிவு செய்திருந்தார் என்று தகவல்கள் வெளியாகின. மேலும், துணை முதல்வரின் சகோதரர் உடல்நலக்குறைவு காரணமாக, கடந்த சில வாரங்களுக்கு முன்பு மதுரையில் இருந்து சென்னைக்கு ஏர்-ஆம்புலன்ஸ் மூலம் கொண்டுவரப்பட்டு, தனியார் மருத்துவமனையில் அனுமதிக்கப்பட்டார்.

சந்திக்க மறுப்பு

இதற்கு, மத்திய அமைச்சர் நிர்மலா சீதாராமன் உதவினார். இந்த சந்திப்பின்போது, அதற்காகவும் நன்றி தெரிவிக்கவும் துணை முதல்வர் முடிவு செய்திருந்தார். நிர்மலா சீதாராமனை சந்திப்பதற்காகதான் டெல்லி வந்திருப்பதாக, ஓ.பன்னீர்செல்வம் நேற்று மதியம் நிருபர்களுக்கு பேட்டி அளித்தார்.

ஆனால், அவரின் பேட்டி வெளியான 45 நிமிடங்களில் மத்திய அமைச்சர் நிர்மலா சீதாராமனின் அலுவலக டுவிட்டர் பக்கத்தில், அ.தி.மு.க. எம்.பி. மைத்ரேயனுக்கு தான் தன்னை சந்திப்பதற்கு நேரம் ஒதுக்கப்பட்டுள்ளது என்றும், துணை முதல்வருக்கு தன்னை சந்திப்பதற்கான நேரம் ஒதுக்கவில்லை என்றும் பதிவிடப்பட்டு வெளியானது.

பரபரப்பு

துணை முதல்வரே வெளிப்படையாக நிர்மலா சீதாராமனை சந்திக்கவிருப்பதாக தெரிவித்த 45 நிமிடங்களில், மத்திய அமைச்சகம் அதை மறுத்து டுவிட்டரில் செய்தி வெளியிட்டது. அ.தி.மு.க.வினருடையே அதிர்ச்சியை ஏற்படுத்தியுள்ளது. இந்த சம்பவம் அரசியல் வட்டாரத்தில் பெரும் பரபரப்பை ஏற்படுத்தியுள்ளது.




Leave a Reply