BREAKING NEWS

அரசு பள்ளி வளாகத்தில்  மது அருந்தியதை தட்டிக்கேட்ட போலீஸ் ஏட்டு கல்லால் அடித்து கொலை – மர்ம கும்பல் வெறிச்செயல்.

காஞ்சிபுரம் சுங்குவார் சத்திரத்தில் பள்ளி வளாகத்தில் மது அருந்திக் கொண்டிருந்தவர்களை கலைந்து போகச்சொன்ன போலீஸ் ஏட்டு பாட்டிலால் தாக்கப்பட்டு, கல்லால் அடித்துக் கொலை செய்யப்பட்டார்.

போலீஸ் ஏட்டு

காஞ்சிபுரம் மாவட்டம் சுங்குவார் சத்திரம் போலீஸ் நிலையத்தில் ஏட்டாக பணியாற்றியவர் மோகன்ராஜ் (வயது 43). கடந்த ஒரு வாரத்திற்கு முன்புதான் இந்த போலீஸ் நிலையத்தில் பணிக்கு சேர்ந்தவர். அதே பகுதியில் தனி அறை எடுத்து தங்கியிருந்த இவர் நேற்று முன்தினம் இரவு வேலைக்குச் சென்றார். போகும் வழியில் அரசுப்பள்ளி ஒன்று உள்ளது. அப்பள்ளியின் கட்டிடத்தில் அமர்ந்து சில நபர்கள் மது அருந்தி கொண்டிருந்தனர்.

இதைப்பார்த்த மோகன்ராஜ் அவர்களிடம் சென்று, ‘பிள்ளைகள் படிக்கும் பள்ளியில் இது போன்று நடக்கலாமா?’ என்று கேட்டு அவர்களை கண்டித்து அங்கிருந்து செல்லும்படி கூறியுள்ளார். ஆனால் அங்கு மது அருந்திக்கொண்டிருந்த கும்பல், ‘நீ யாரு எங்களைக் கேட்க? போலீஸ் என்றால் பயந்துவிடுவோமா?’ என்று கேட்டு மிரட்டினார்.

வாக்குவாதம்

ஒரு கட்டத்தில் வாக்குவாதத்தில் ஈடுபட்ட அவர்கள் திடீர் என்று தங்கள் கையிலிருந்த மது பாட்டிலால் மோகன்ராஜ் தலையில் அடித்துள்ளனர். ரத்த வெள்ளத்தில் மோகன்ராஜ் நிலைகுலைந்து போக கல்லால் தலையில் தாக்கியுள்ளனர். அவர்களிடமிருந்து அவர் தப்பிக்க முயல போதை வெறியில் இருந்த அந்த கும்பல் பாட்டிலை உடைத்து மோகன்ராஜ் வயிற்றில் குத்திவிட்டு ஓடியது.

இதில் ரத்த வெள்ளத்தில் சம்பவ இடத்திலேயே மோகன்ராஜ் உயிரிழந்தார். காலையில் அப்பகுதி வழியே சென்றவர்கள் போலீஸ் உடையில் ஒருவர் ரத்த வெள்ளத்தில் பிணமாகக் கிடப்பதைப் பார்த்து அதிர்ச்சியடைந்தனர்.

தனிப்படை

இது குறித்து பொதுமக்கள் போலீசாருக்கு தகவல் தெரிவித்தனர். சம்பவ இடத்திற்கு டி.ஐ.ஜி தேன்மொழி, எஸ்.பி சந்தோஷ் ஹதிமானி ஆகியோர் நேரில் வந்து விசாரணை நடத்தினர்.

போலீஸ் ஏட்டு மோகன்ராஜை கொலை செய்த குற்றவாளிகளைப் பிடிக்க போலீசார் முடுக்கிவிடப்பட்டு உள்ளனர். குற்றவாளிகளை பிடிக்க 2 தனிப்படைகள் அமைக்கப்பட்டு போலீசார் தீவிர விசாரணை நடத்தி வருகின்றனர். குற்றவாளிகளை தட்டிக்கேட்ட போலீசாரே மர்ம கும்பலால் கொல்லப்பட்டது அப்பகுதியில் பரபரப்பை ஏற்படுத்தியுள்ளது.




Leave a Reply